pres le dernier edict du Roy qui a esté faict sur la pacification
des troubles de ce royaume, se presenterent quelques
differens à l’execution et acomplissement d’iceluy.
Tellement que pour les assoupir et faire entendre clairement le
bon vouloir et intention de sa maiesté, et mesmement leuer tous les
doutes de desfiance à ceux de la religion pretendue reformée, et
autres de leur complicité, la Royne mere du Roy s’achemina au
pays de Gascoigne où estoit le Roy de Nauarre tittre de ce party,
auec lequel et les plus grans de sa compagnie et du remuement
de ces troubles, elle entra en pourparlé et conference. Et en resolution
depuis accordez par le Roy, que outre les villes de refuge
qui auoiēt esté baillees aux susdits de la religion par ledit edict
durant l’espace de six ans, seroient encores à ce mesme effait
baillees par l’espace de six mois seulement, autres villes de la
France : Entre lesquelles est la ville de Sainct Agreue, qui est
assise aux montaignes du pays de Languedoc en vn lieu fort hault
et de difficile abord, d’autant qu’elle est sur vn coupeau de montaigne
commandant de sa nature et situation à tous les autres
lieux des environs, assise encore sur les confins et limites des
pays de Vellay et Viuerois, et des dioceses du Puy et de Viuiers
qui sont dans les enclaves dudit pays de Languedoc, et communement
participante des conditions de l’vn et de l’autre desdits
deux pays et dioceses. Car pour le fait de la iustice elle est du
pays et bailliage de Vellay et seneschaucée du Puy, ville capitale
dudit pays de Vellay. Et pour le regard de l’eglise imposition et
contribution des deniers du Roy, aides et subsides pour le faict
de la guerre elle est du pays de Viuerois et diocese de Viuiers.
Et ne eussent peu ceux deladite religion pretendue tant de l’vn
que de l’autre desdits pays et dioceses et qui sont en assez bon
nombre, choisir n’eslire lieu qui leur eust esté plus propre et
convenable : De maniere qu’ils faisoiēt vn estat asseuré de ladite
ville Sainct Agreue pour leur seruir de perpetuelle garde et asseuree
deffence. Attendu mesmement que depuis l’occupation
