Page:Société agricole et scientifique de la Haute-Loire - Mémoires et procès-verbaux, 1881-1882, Tome 3.djvu/184

175

variétés historiques et biographiques

rois, le sieur de Tournō fleur de la noblesse dudit pays et capitaine aussi de cinquante hommes d’armes, de pourueoir au fait de la réduction de ladite ville de Sainct Agreue. A quoi lesdits seigneurs gouverneurs obtemperans tant de l’auctorité à eux cōmise et attribuée par sadite maiesté que des moyēs particuliers de leurs grādeurs. De la noblesse et autres estats des pays où ils commandent, ont satisfait et procedé si vertueusemēt que l’intention du Roy a esté en cest endroict entierement acomplie. Ladite ville Saincte Agreue reduicte en sa vraye obeissance : Lennemy chassé d’icelle et lesdicts pays remis en pure et pleine liberté et asseurance comme il sera cy apres plus amplement declairé. Mais avāt que parler plus auant de ladicte réduction comme de chose qui appartient grandement au faict d’icelle : faut entendre que outre ladite ville de Sainct Agreue lesdits de la religion tenoient et occupoient à deux lieuës d’icelle dans ledit pays de Viuerois vne autre ville appellée Dezany, appartenant audit sieur de Tournon : De laquelle ils ne faisoiēt moins d’estat q de ladite ville Sainct Agreue : Mais ledit sieur de Tournon qui en est seigneur iurisdictiōnel par sa grande vertu et dexterité et d’aucuns autres sieurs gentilshōmes ses vassaux officiers et autres deuots et affectionnez à son service, trouua moyen en plain jour et heure de non defiance de les surprendre et faire faire bresche par dedans la ville. Par laquelle il entra auecques sa troupe embusquee au dehors nōgueres loing de là, et s’en rendre le maistre. L’ayāt depuis bien sceu garder et cōserver, et repousser par plusieurs fois l’ennemy bien marry et desplaisant d’auoir perdu vne telle retraicte qui s’est efforcé par tous les moyens qu’il a peu inuenter de la reprendre sans luy seruir ny proufiter qu’à faire paroistre de plus fort la valleur de ce noble seigneur qui la leur a substraite, et qui n’a cessé depuis de les molester et courir iusques aux portes dudit sainct Agreue : n’osans ceux de dedans sortir ny battre la campagne de ce costé là comme ils auoient accoustumé de faire auparauant. Et cependant que ledict sieur les tenoit en ceruelle, ledit sieur de Sainct Vidal ostoit occupé d’ailleurs aux marches de l’Auuergne et du pays de Lymosin à l’expugnation de plusieurs autres villes et forts chasteaux detenus par lesdits ennemis, où il auroit si bien besongné aussi qu’il en seroit venu victorieux et rendu tous les susdits pays paisibles. De maniere qu’ayant accom-