des premiers en miracles, St François de Paule ; ils on expéré que, tant en l’intercession de ce St, que par l’haustéritté de ceulx qu’il a institués, et par leurs prédications, la dévotion et aultres sainctes fonctions qu’ils exersent, la devotion qui aloist seslangorant reprondroit vigueur et force, les abus seroient tornés en respect, et le nom de Dieu plus autanticquement sanctiffié.
Partant advertis que révérand père, frère François Humblot, estoit provincial de la province de Lion, de l’ordre des Minimes, l’on, par l’entremise de monsieur de Montravel, à cest effaict, convyé à visiter le lieu sacré qu’ils luy on présenté pour y eriger ung couvent de son ordre ; lequel venu et adcisté de vénérables pères, le père Joffroy son collègue, substitut, et de Pierre Tillot, aussi son collègue, entendant le mesme offre luy estre faict, de bouche, par les dicts sieurs qui désirent estre fondateurs du dict couvent, a reputté la faveur et grâce, et a reçeu, avec beaucoup d’obligacions, une si bienveillante ouverture, acceptant sans tergiverser tant le couvent que fondation.
Par ceste raison, le dict père Humblot, adcisté comme dessus, avec les dicts sieurs comptes, doien et chanoines dudict chappitre, on passé et accordé les contrats de fondation, acceptation, promesses et obligations cy après escriptes : « Par ce, scavoir faisons que pardevant nous, Anthoine Chaudon, et Ettienne Pradon notaires royaulx à Brioude soubssignés, et en présence des tesmoingts soubs escripts, on esté présents et personnellement establis, nobles et vénérables personnes, Mes Jehan de Ludesse, doien, Claude de Mornay, Anthoine de Colonges, Jehan de Chaudenon, Claude de Sereys, François de Cussat, Marcq de Besse, Loys de Carbonnel, Charles Pons, jeune, François de Sereys, Michel de Carbonnel, François d’Arfuliette, Gaspard de Valivier, Anthoine du Cheyri, Jehan Helie Farradesches, Gilbert de Bosredon et Jacques de La Housse, baile ; tous capitullerement assemblés en la chapelle St Cosme et Damien, estant au dessoubs des cloistres de la dicte esglise St Julhen, où ledict sieur chappi-
