que, ou par celui a cui elle sera baillee à garder pour ajuster, la justice li est tenue a baillier ajustee et seignee de nostre seing et de l’evesque, et celle mesure ainsint prise de un ou de pluseurs, ou de ceuls a qui il plaira a demorer en la dite ville, il pouet vendre son ble, et mesurer en sa maison, par lui ou par sa gent, se il plaist a luy et a l’achateur, frenchement, senz nulle redevance ne imposicion paier, et senz dongier et senz amende dou seigneur. Et se il ne plaisoit a l’acheteur ou au vendeur a mesurer a la mesure dou dit vendeur, ajustee et seignee si comme dessus est dit, et il pleust a euls deus, ou a l’un de euls, aler mesurer a la mesure dou marchie, ou envoyer querre la mesure de la dite ville et le mesureour, il paieront la dite imposicion ausint comme se il avoient mesure le dit ble ou marchie et a la mesure dou marchie.
Item, il fu ordene, pour ce qu’il est crie que chascuns porte son ble au marchie pour vendre et pour mesurer a la mesure dou marchie, que quicunques forains ameinne ble en la dite ville au jour du marchie, il est tenu dou mener en la place dou marchie et non mie a autre jour, et le puet mesurer, se il lui plaist, ou se il plaist a l’achateur, a la mesure dou marchie, et paieront le denier dou setier, et de la mine, la maille, se il est mesurez a celle mesure, si comme dessus est dit ; et se il leur pleist, dou commun assentement de euls deus, de porter ble vendu a la maison de l’achateur pour mesurer a sa mesure, qu’il aura prise de la justice ajustee et seignee, faire le povent senz amende et senz dongier dou seigneur et senz imposicion paier.
Item il fu ordene que cil qui oront leur ble en leurs greniers, se il leur plaist, il le povent vendre en leurs greniers senz mener au marchie, et le povent mesurer a la mesure qu’il aura prize de la justice par lui ou par sa gent, se il plaist a l’acheteur, et se il ne plaist a l’acheteur, il sunt tenus de mesurer a la mesure dou marchie, ou envoyer querre la mesure et le mesureur de la dite ville, a toute sa mesure d’icelle ville, et lors il sunt tenuz a l’imposicion paier, si comme desus est dit.
Item, il disoient que, en la ville dou Puy, souloit avoir certaines aunes, c’est assavoir aunes pour les bons draps, aunes pour les bureaus, et autres aunes pour les toilles, et que l’en leur ha ostées ces aunes et mises nouvelles : si requeroient que cette nouvelleté leur fust ostées, et que leurs aunes anciennes leur fussent rendues : Oyes sur ce les raisons des dites parties, il fu ordene que en la ville dou Puy n’aura que une aune pour bons dras et pour bureaus et pour toilles, c’est assavoir la plus grant des aunes qui soloit estre au dras avant le pariage, la quels sera faite de fer pour exemplaire
