d’excuser la prolixité de ceste lettre par laquelle je vous en fais le plus succinct et véritable discours que je puis. C’est qu’après la mort du feu sieur de Sainct Vidal, ayant réduit sous vostre obéissance toutes les places de ce pays, excepté la ville du Puy, sur le mois de juillet, estant assisté du sieur de Chambaud et de son régiment de gens de pied, je me mis en devoir de faire le gast et empescher ceux du Puy de faire leur moisson, et pour cet effet je fis réédifier et réparer les ruines du chasteau d’Espaly, proche d’une canonade de ladicte ville, m’estant logé en leurs fauxbourgs et les ayant réduitz à toute extrémité, sans le secours qu’ilz eurent premièrement des ligueurs du pays de Viverès et puis du sieur d’Urfé et de toutes les forces du pays de Forest, par lesquelles toutesfois on ne nous peust détourner de nostre dessein de la réparation dudit Espaly, qui ne se passa sans plusieurs combats, la pluspart à nostre advantaige, mais ceulx de ladicte ville du Puy prévoyant leur captivité infaillible s’ilz se laissoient encloire par ledict fort, ne cessèrent d’importuner tant ceux de la ville de Lyon que Monsieur le duc de Nemours, qu’enfin ilz obtinrent de luy qu’il les vint secourir avec toutes ses forces sur le mois d’aoust, et ayant premièrement le marquis d’Urfé, puis ledict sieur de Nemours assiégé ledict Espaly et le battu de cinq pièces et quelques moyennes et tiré environ 800 coups de canon, sans y rien advancer, comme ceste place freichement et dans 15 jours réparée ne pouvoit sitost estre bien munie, les assiégés furent après environ un mois réduitz à nécessité de vivres et d’eau principalement, qu’ilz endurèrent jusques a boire trois jours durant de leur urine, qui fust cause que le sieur de Sénenghoul, qui pour l’haine que le party contraire luy porte ne se vouloit fier aux capitulations, s’estant sauvé avec partie de ses gens en une sortie, le surplus, qui avoit esté empesché de le pouvoir suivre, capitula et rendirent la place, vies sauves, ce qui ne fust advenu si j’eusse pu retirer du secours des gouverneurs circonvoisins du Viverès, Auvergne ou Dauphiné, qu’en vain je ne cessay d’implorer, voire seulement jusques à cent ou 150 maittres ; car avec l’infanterie dudict sieur de Chambault et mienne on avoit moyen de ravitailler ledit Espaly, ce que faisant ledit sieur de Nemours estoit dutout arresté, et l’orage qui depuis a affligé si avant toute l’Auvergne et autres pays, où ledict sieur de Nemours a esté, ne s’en fust ensuivi ; mais me trouvant frustré et desnué de toute ayde et les places non tenables de ce pays rendues audit sieur de Nemours, la plupart de la noblesse de ce pays qu’avoit tenu pour vostre service, craignant la perte de leurs maisons, vint trouver ledit sieur de Nemours, desquelz il print serment, selon le formulaire qu’il leur bailla, qu’est en somme de ne recog-
