1560, 8 avril.- S. l.
Testament de Lucrèce de La Lune, femme de Charles de Myneray, seigneur d’Armainvilliers et de Gretz : après sa mort, son corps sera autopsié par des médecins et chirurgiens experts et inhumé en l'église de l'Ave-Maria ; elle lègue 2000 livres tournois à Pandolfe de La Lune, son oncle, demeurant à Avignon, et nomme pour exécuteurs testamentaires Laurent de Lenzi, évêque de Fermo et à présent ambassadeur du Pape, Pandolfe de La Lune, son oncle, Jean de Bonacoursy, docteur en droit, avocat en Parlement.
Archives nationales, MC/ET/LXVIII/27, fol. 180 (Minutes de Hervé I BERGEON).
Fut presente en sa personne noble damoiselle Lucresse de La Lune, femme de Charles de Myneray, escuyer, seigneur d’Ermainvillier et de Graiz, saisine de corps, pensee, memoire et entendement comme elle disoit et que de prime face est apparu aux notaires soubzsignantz, allant et cheminant par la ville et partout où bon luy semble, considerant en elle qu’il n’est chose en ce monde mortel plus certaine que la mort ne moings incertaine que l’heure d’icelle, ne voullant decedder intestat et sans disposer des biens qu’il a pleu à Dieu nostre createur, saulveur et redetempteur Jhesuscriste luy prester et envoier en ce monde mortel ains pendant qu’elle est saine et dispose et que sens et entendement sont en elle et que raison gouvergne sa pensee, a voullu et veult pourvoir au salut et remedde de son ame et comme bonne chrestienne et vraye catholicque feist et ordonna, faict et ordonne son testament et ordonnance de derniere volunté ou nom de Père, du Filz et du benoist saint Esperit en la forme et maniere qui s’ensuit : Et premierement a recommandé et recommande son ame à Dieu le createur nostre saulveur et redetempteur Jhesuscriste, luy requerant mercy et pardon des pechez et offenses par elle commis et perpetrez contre ses sainctz commandemens, à la glorieuse Vierge Marie, à monsieur saint Michel l’archange et à toute la court celeste de paradis, les prians et requerans estre intercesseurs pour elle envers Dieu maintenant et à l’heure de son decez et trespas. Item feist et faict son testament de cinq solz parisis pour estre distribuez en la maniere acoustumé. Item veult et ordonne ses debtes estre paiés et torffaictz reparez par ses exécuteurs cy-après nommez. Item apres que son ame sera partie d’avec son corps veult et ordonne son corps estre ouvert et visité par medecins et cirurgiens expertz. Item veult et ordonne estre soigneusement ensepvelye, enterree et inhumee en l’eglise de l’Ave Maria à Paris. Item quant à son convoy, enterrement, lumi[n]aire, services et bout de l’an, elle s’en rapporte de tout à la discrection de sesdits executeurs cy-apres nommez.
