Page:Tristan L’Hermite - Les Amours de Tristan, 1638.djvu/114

La bibliothèque libre.
Le texte de cette page a été corrigé et est conforme au fac-similé.


LES IVSTES REPROCHES.

ODE.



CLorinde ie le cognoy bien
Mes ſoins n’obtiendront iamais rien
D’vne ingratitude ſi noire.
Ma plainte aigriſt voſtre rigueur,
Et bien loing d’eſtre en voſtre cœur,
Si ie ſuis en voſtre memoire
C’eſt pource que vous faites gloire
De me voir mourir en langueur.

I’ay beau par mille inuentions
Vous deſcouurir mes paßions
Et les rigueurs de voſtre Empire :
I’ay beau vous monstrer mes deſirs
Et vous conter mes déplaiſirs ;
Vous ne faites iamais que rire
De mon trouble & de mon martyre,
De mes pleurs & de mes ſouſpirs.