Henry, ce vertueux prince,
Quy, en despit des abboys,
A conservé sa province.
Perturbateurs du repos,
Croyez que tost vostre engeance
Pour le butin d’Atropos
Finira dans nostre France.
Stances.
Je ne recherche point le sable de Pactolle,
Ny l’arène de Gange ou bien l’or de Cresus,
Ny moins les grands tresors de l’un ou l’autre polle.
Mais je cherche plutost le mirouer des vertus.
Ô precieux mirouer qu’entre tous biens j’estime,
Que l’on voit de thresors et de riches moyens
Au travers de la glace où la vertu domine,
Plus precieux cent fois que ceulx des Indiens.
Celuy quy maria les lettres à l’espée,
Ce puissant empereur, la terreur des meschants,
Mesprisa les joyaux de parure jaspée
Et chercha la vertu jusqu’à fin de ses ans.
Je ne dy point heureux les enfants de fortune
Qui souvent en grandeur se voient eslevez,
