duist cele meesme navie pour gaster les rivages de la mer de Dalmacie. Mès Pos[1], qui estoit chevetains de la navie d’Orient, que li empereres de Costantinoble ot là envoié pour destruire Ythalie, vint contre lui en l’aide des Dalmaciens. Pour ce, s’en retorna la navie le roi Pepin sanz autre chose faire. En ce tens, morut Hruoltrut, l’ainnée des filles l’empereor, en viiie yde de jugnet[2].
En ce point demoroit encores li empereres à Es la Chapele, et proposoit à ostoier hastivement sor Godefroi, le roi de Danemarche, quant noveles li furent aportées que la navie des Danois de cc nés estoit arivée en Frise et que ele i estoit encores. Si avoit ja degastées toutes les ysles qui sont sor le rivage de Frise, et avoient ja fait iii batailles aus Frisons ; mès li Danois estoient vainqueor, les Frisons avoient faiz trubutaires de c livres d’argent que il lor avoient ja paiées ; si s’en pooient ja bien estre retorné en lor païs. Et sanz faille, la veritez estoit tele come les noveles disoient que li rois Godefroiz avoit amenée cele navie en Frise. De ceste chose fu li empereres forment esmeuz et si engrés[3] de ceste honte venchier, que il envoia tantost ses corsiers par toutes les provinces de son empire pour ses oz assembler. Il meismes mut tantost a tant de gent com il pot avoir, et proposoit à passer le Rim et à atendre ses oz sor le rivage de Lippie[4]. Tandis com il demoroit, morut li elephanz que
