LIVRE QUATRIÈME
Ci commencent li chapitre du quart livre des faiz Karlemaine.
Li premiers des faiz d’Espagne ; si parole premierement de l’avision et du signe que Karlemaines vit ou ciel, et coment saint Jaques s’aparut à li et li dist que il delivrast la voie jusques là où ses cors gist, et comment Pampleune fut passée et toute la terre jusques au perron Saint Jaques, et puis coment il fist baptizier les Galiciens et occierre ceus qui baptesme ne voloient recevoir.
Li seconz parole des nons des citez et des viles que Karlemaines prist en Espagne, et coment la cité de Luiserne fondi à sa proiere, et puis des iiii citez que il maudist, et puis de l’image Mahomet qui a non Salahancadis et de la force que ele a par une legion de deables qui dedenz est enclose, et puis des eglises que Karlemaines edifia, de l’or et des richeces que li roi d’Espagne li donerent.
Li iii parole coment li rois Aigolanz reprist la terre d’Espagne puis que Karlemaines fu retornez en France, et coment Karlemaines mut contre lui, et d’un exemple qui mostre quel peril il a en recevoir executions de morz, et puis coment Karlemaines quist tant Aigolant que il le trova. Des batailles que François firent contre Sarrazins, autant contre autant ; des lances qui repristrent en terre, de ceus qui devoient morir en
