Nubles, Guinarz, Estormiz, Thierris, Yvoires, Berengiers et Hatons, tuit cist i amenerent granz oz. Turpins li arcevesques de Rains et Ganelon li traitres qui vendi les vii pers au roi Marsilion, cist i amenerent grant gent. Li oz de la propre terre Karlemaine estoit prisiez à xlm chevaliers. D’autre gent et de genz à pié n’estoit nus nombres. En tel maniere entra Karlemaine a tout ses granz oz en Espagne et porprist les montagnes qui sont devant la cité de Pampelune, où Aygolant l’atendoit à bataille. Mais quant il vit les granz oz que il ot amenées, il se commença forment à merveillier de son pooir. Si granz paors le prist que il ne s’osa à li combatre, ainz requist trives pour parler à Karlemaine, et li empereres les li otroia volentiers.
[1]Puis que trives furent donées, et ce vint au l’endemain, Aygolant oissi de la cité, il et sa gent ; delez la vile lessa son ost ; lx des plus hauz homes prist et vint à Karlemaine qui estoit à une mile de la cité. Li oz des crestiens et des Sarrazins estoient logié en un trop bel plain et trop grant, assez près de la cité ; si avoit bien
- ↑ Turpini historia Karoli magni, chap. xii.
