aceinstrent de toutes parz. D’une part, Hernauz de Biaulande a tout son ost ; d’autre part, li cuens Estouz de Langres a toute sa gent ; d’autre part, Gondebues, li rois de Frise, il et ses oz ; d’autre part, li rois Constantins, il et sa gent ; et d’autre part, Rolant et Olivier a toute lor gent ; et d’autre part, Karlemaines et tout ses oz. En els se feri premiers Hernauz de Biaulande ; tant en occist et trebucha à destre et à senestre que il vint jusques au roi Aygolant qui ou milieu de sa gent estoit. Tant par s’esvertua que il l’occist de s’espée. Lors leva merveilleus criz de touz sens ; es Sarrazins se ferirent crestien de toutes parz, et tant i ferirent et chaplerent[1] que il les occistrent touz. Là fu l’occisions des Sarrazins si granz que nus n’en eschapa, fors li rois de Sebile et li aumaçors de Cordres, et aucun de lor gent. Cil s’enfuirent a petite compagnie. En cele jornée, i out tant de sanc espandu que li vainqueor nooient en sanc jusques sor les chevilles des piez[2]. Prise fu la citez et tuit li Sarrazins qui dedenz furent trové occis.
Pour ce occist Karlemaines Aygolant, que il se combati à li pour l’estrif et pour le covenant de la foi crestiene. Pour ce apert que ele sormonte toutes manieres de loys et de creances par sa bonté ; mais simplement toutes autres manieres de creances sont errors et mescreandises, et ele seule sormonte en ciel les angels et les archangels.
O tu crestiens, se tu tiens bien ta foi et aemplis par ovres les comandemenz de l’Evangile, tu sormonteras les angels en Paradis ovec ton chief Jhesu Crist, de
