geanz fu laz et pesanz, et ot trop grant talent de dormir. Trives demanda à Rolant jusques atant que il eust dormi, et il les li dona volentiers. Fernaguz s’endormi, qui moult estoit travailliez, et Rolant qui estoit jovenciaus, forz et haligres, li aporta une pierre soz son chief, pour ce que il dormist plus volentiers, car ne Rolant, ne autres ne li osoit mal faire tant come les trives duroient, par la constitution qui estoit tele[1], que se crestiens donast trives à Sarrazin, ne Sarrazins à crestien, li uns n’osoit mesfaire à l’autre, et cil qui brisoit les trives avant que il l’eust defié estoit par droit tantost occis.
Quant Fernaguz ot assez dormi, il s’esveilla et se tint en seant. Rolant s’asist delez lui et li demanda coment il estoit si forz et si durs que il ne doutoit cop de lance, ne de baston, ne d’espée. « Par nul sens », dist li geanz, « je ne puis estre navrez, fors par le nombril. » Si parloit en langue spanoise que Rolant entendoit assez. Lors le commença li geanz forment à regarder, et se merveilloit moult de sa proece et de ce coment il pooit vers li avoir durée. Lors li demanda coment il avoit non. « Je ai non Rolant », dist-il. « Et de quel lignage i es-tu, qui si fort te combaz à moi, et si forment me travailles ? » « Je suis », dist Rolant, « nez du lignache de France[2]. »
