Page:Viard - Grandes chroniques de France - Tome 3.djvu/290

La bibliothèque libre.
Le texte de cette page a été corrigé et est conforme au fac-similé.

bataille. Mais li Sarrazins se retraistrent ariers, quant il les virent assemblez et ordenez en conroi, et crestien tendirent lor tentes et demorerent iluec maismes jusques au matin. Au point du jor se leverent, et se conseilla Karlemaines à sa gent que il feroient. Lors, fu crié par tout l’ost que chascuns covrist la teste de son cheval de toile ou de dras, si que il ne peussent vooir les barboires, et estoupassent forment les orilles, si que il ne peussent oïr les criz des Sarrazins, ne les sons de lor tympanes. O ! com grant engin et soutil troverent contre la malice des Sarrazins. Quant il orent ensi fait, li cheval alerent hardiement avant, qui petit de force i fesoient en lor espoantemenz, pour ce que il ne les veoient ne n’ooïent. Lors commencierent li crestien la bataille hardiement, et forment se combatirent jusques à l’eure de miedi. Moult en occistrent ; mais il ne les porent pas vaincre du tout, car il estoient tuit joint ensemble. Si avoit ou milieu d’aus i chars, que viii buef menoient, et desus une ensegne à quoi il se ralioient. Mais tantost come Karlemaines l’aperçut, il se fera en la torbe des Sarrazins, garniz et avironez de la vertu Nostre Seigneur. Lors commença à occire et à craventer à destre et à senestre jusques atant que il vint à l’estandart qui sor le char estoit. Et tantost com il ot copée la perche qui la baniere soustenoit, se desconfirent li Sarrazins et commencierent à fuir en diverses parties. Li crestien pristrent lors à crier et à huer et se ferirent es Sarrazins et en occistrent viiim. Là fu occis li rois de Sebile, et li aumaçors de Cordres eschapa et s’enfui atout iim Sarrazins. En la cité se mist ; l’endemain la rendi à Karlemaine, par tel covent que il recevroit baptesme et la tendroit de lui et des