Quant li rois ot diligenment seu et enquis coment les choses aloient entre les Romains et les Lombarz, et il ot aperceu certainement que l’eglise de Rome estoit grevée sanz raison, il prist la besoigne sor lui et se establi defendeor de sa partie. Les oz de France esmut et vint en Borgoigne jusques à une cité qui a non Genes[1], si siet sor le flueve du Rone. Là ordena coment il porroit mieuz conduire les oz es plains de Lombardie ; en ii parties les devisa ; l’une en livra à un sien oncle qui avoit non Bernarz et li commanda que il alast par les monz de Monjeu[2] ; l’autre partie retint ovec soi et la conduist par les monz de Moncenis ; et quant li rois et ses oz orent les montaignes sormontées et les periuz trespassez, il descendirent en la plaine de Lombardie. Li rois Desiers li vint au devant, il et ses oz toz ordenez à bataille ; mais pour noient, car il s’enfuirent sanz estor et li rois le chaça et l’enclost en une cité qui avoit non Thicine, mais or est apelée Pavie. Tot l’yver demora li sieges devant la cité, car ele estoit trop forz à prendre.
Incidence. —[3]Hunauz, li dux d’Aquitaine, duquel l’estoire a lassus parlé, s’enfui aus Romains, des Romains aus Lombarz, là devint apostates et mescreanz et renoia la foi de sainte Eglise ; en poi de tens après fu lapidez et craventez de pierres.
[4]Son ost lessa li rois devant la cité, et ala à
- ↑ Genes, auj. Genève (Suisse).
- ↑ Les monz de Monjeu, auj. le grand Saint-Bernard.
- ↑ Chronique de Sigebert de Gembloux, année 771. Le même fait est rapporté par une vie d’Étienne II (752-757). Il s’agirait donc alors d’Hunald, fils d’Eudes (voir Liber Pontificalis, éd. Duchesne, t. I, p. 441 et 456, n. 7).
- ↑ Annales d’Éginhard, année 774.
