et les escomenia se il se ratraoient de l’aliance et de la feueté que il avoient au roi promise. En tel maniere s’en departirent sanz plus faire de la besoigne pour qui il estoient venu.
Après ce que li rois ot les apostres et les sains lieus humblement vizitez, ses veuz et ses oblations rendues, il mut à retorner en France. La roine Fastrade, ses fiuz et ses filles et tote lor compagnie, trova en la cité de Warmaise ausi come il les i avoit lessiez, et assembla general parlement des barons et du pople avant que il s’en partist. Lors commença à raconter devant ses princes coment il avoit esploitié en cele voie, et au derenier lor conta des messages le duc Thassile, et pourquoi il estoient à li venu.
[1]Quant li rois fu du tot retornez en France, il ot conseil à ses barons de la besoigne le duc Thassile. Aucun loerent que il essaiast que il vorroit faire de l’offre que il li avoit faite ; mais totes voies assembla-il ses oz por ostoier en Baiviere et les devisa en iii parties. A son fil Pepin livra l’ost des Lombarz et li commanda que il alast par la valée de Stridente[2]. Les François Astrasiens et les Saines fist aler droit au flum de la Dynoe, à un lieu qui a non Proferingue[3]. Avec soi retint la tierce partie de sa gent ; si les con-
