en l’eglise Nostre-Dame[1]. Après ce, il s’en vint à Compiegne. Li traiteur qui estoient à Verberie sorent ja bien comment il avoit ovré. Pour ce, envoierent Gerin et Lambert à Loon et leur commanderent que se la roine fesoit dangier, que il la sachassent à force hors de l’eglise et qu’ele fust là amenée. Cil le firent ensi com il leur fu commandé, et quant ele fu venue, il li firent soufrir asez de paines et de gries, et par paor de mort la contrainstrent à ce que ele leur promist que se ele pooit parler à son segneur, ele li amonesteroit et proieroit que il meist jus, de sa volenté, le baudré de chevalerie et le signe d’empereor et puis se feist tondre en religion[2] ; et puis, leur promeist que ele maismes métroit voile seur son chief et devendroit nonnain. Et de tant comme li traiteur desirroient plus ceste chose, de tant croient-il plus legierement que ce peust avenir. Pour parler de ceste besoigne l’envoierent à Compigne à l’empereor, a grant compagnie de leur gent, et quant ele pot à li parler priveement, ele li proia que il souffrist qu’ele meist voile seur son chief[3] pour eschiver la mort. De ce que li traiteur requeroient pour li, il respondi que il en auroit conseil.
De si très grant haine haoient li traiteur le preudomme et sanz raison, qui touz jors avoit vescu si debonairement vers toutes genz, et leur pesoit dont cil vivoit, par cui benefice il meismes vivoient, qui par leur meffait deussent morir selonc les loys. Après ce
