espace de soi repentir, en tele maniere toutevoies que il n’eust pooir, ne li sien, de faire les maus que il pensoient. Et quant il fu traiz hors de prison et amenez avant, tuit cil qui là furent present commencierent à crier que il eust les ieuz crevez, pour ce que tuit cil qui à mal faire tendoient pour couverture de lui fussent du tout hors de leur esperance, et que sainte Eglise et li roiaumes demorast en bone pais ne jamais ne fust troblée pour lui.
En ce tens vint à Franquenefort Loys, li rois de Germanie ; là maismes celebra la Nativité Nostre Segneur avant que il s’en partist. Après, i tint parlement entor les kalendes de fevrier et manda à ses II fiuz, Kallemanne et Looys, que il i fussent, et à touz ses homes feutables qui avoient esté du roiaume Lothaire. Et tandis com il demoroit là, avint une merveilleuse aventure que li deables prist semblance de bon ange et vint à Kallemaine l’un des fiuz le roi Loys, et li dist que Diex s’estoit corrociez à son pere et le voloit occierre pour la raison de Loys son frere et li devoit tolir le roiaume et à lui doner. Kallemaine, qui moult fu espoantez de tele avision, se leva touz effreez et s’enfui en un mostier qui assez près estoit de la maison où il gisoit.[1](Si ne fu pas de merveille se il fu espoantez, car il a tel difference entre l’avision de l’ange Dieu et du deable, quant il faint semblance et clarté du bon ange, que cil qui a veue l’avision et l’ange Dieu demore en joie et en bone esperance, et cil qui a veue l’avision du mauvés ange demore en paor et en tristece). Li deables le sui et entra eu mostier après lui et
- ↑ La phrase entre parenthèses est de l’auteur des Grandes Chroniques.
