part, furent li fil Godefroi qui ja fu rois de Danemarche, à grant ost, et si avoient navie[1] de cc nés. Avant n’oserent venir ne plus faire ; si departirent a tant d’une part et d’autre sanz bataille. Les genz l’empereor gasterent et ardirent tout le païs devant aus ; le païs ramenerent en l’anciene subjection, xl ostages reçurent des barons et du pople de la terre et puis retornerent à l’empereor qui lors tenoit parlement en un lieu qui a non Patebrun[2]. A ce parlement estoient venu li plus grant prince des Esclavons orientiex.
Droit en ce tens, requist à l’empereor trives de iii anz Zabulaz, i rois sarrazins[3]. Premierement furent otroiés et accordées ; mais puis furent rapelées pour ce que eles ne tenoient nul porfit, et fu bataille mandée aus Sarrazins.
En ce tens repairierent de Costantinoble li evesques Norberz et li cuens Ricoins que li empereres ot là envoiez en message. Si raporterent pais et aliances confermées entre les François et les Grex.
En ce maismes tens, avint que li apostoiles Leons acoucha malades, et tandis com il gisoit au lit, li Romain, qui pas ne l’amoient, pristrent et saisirent sanz atendre joustice ne jugement, tout quanque il disoient qui leur avoit esté tolu, et chans, et vignes, et jardins, et maisons que li apostoles avoit faites toutes noveles.
- ↑ Navie, flotte.
- ↑ Patebrun, auj. Paderborn.
- ↑ D’après Éginhard, Annales, année 815, ce serait la paix conclue en 812 avec l’émir de Cordoue Hakem Aboulassy qui aurait été rompue (cf. ibid., année 812) : « Pax quæ cum Abulaz rege Sarracenorum facta, et per triennium servata erat, velut inutilis irrupta. »
