reres, et par ovre et par bouche, et disoit que quicunques s’umilioit, fust en povreté ou en habit, à l’example de Jhesu Crist, que il seroit haut assis es cieus ; si que par son amonestement, li prelat et li clerc commencierent à lessier et à metre jus les baudrez et les ceinz d’or et d’argent charchiez d’aumosnieres de soie et de coutiaus à manches d’or et de pierres precieuses, les robes de dras especiaus, les frains et les esperons dorez. Et disoit li sains empereres que ce li resembloit monstre quant les persones de sainte eglise, qui example d’umilité doivent doner au pople, usent de tiex aornemenz selonc la vaine gloire du monde.[1]Mais li anemis de pais ne souffri pas longuement sanz bataille et sanz temptation la sainte devotion du preudome, ainz s’efforça en toutes manieres de li troubler par li et par ses membres, et esmut contre lui et prelaz et barons, et neis ses propres fiuz, si com nous dirons ci après.
Quant il ot ordené de ces choses, si com vous avez oï, il ordena après l’estat de ses fiuz. De Lothaire, l’ainzné, fist empereor et vout que il fust empereor clamez. Pepin, l’ainzné après, envoia ou roiaume d’Aquitaine, et Looys le tierz, en Baiviere, pour ce que li poples seust à cui il deust obeïr.
Tantost après ces choses, li vindrent noveles que li Abrodite[2] qui estoient en sa subjection s’estoient torné contre lui et alié aus fiuz le roi Godefroi, et ja degastoient cele partie de Saisone qui siet seur le flum
