Page:Viard - Grandes chroniques de France - Tome 7.djvu/133

La bibliothèque libre.
Le texte de cette page a été corrigé et est conforme au fac-similé.

tout avant euls, une espie vint au conte de la Marche et li dist que les forriers au roy de France gastoient tout le païs. Quant le conte oï ces nouveles, si commanda à ses filz qu’il s’armassent et à touz ses chevaliers, et alerent contre les forriers isnellement pour euls desconfire. Le conte de Boulongne[1] oï dire que le conte de la Marche venoit sus les forriers ; si se hasta mout d’euls secorre et s’en vint droit au conte de la Marche. Là fu le poigneis fort et aspre, et li abateiz d’ommes à pié et à cheval. A ce premier poigneiz fu ocis le chastelain de Saintes qui portoit l’enseigne au conte de la Marche. François qui bien sorent que le conte de Boulongne se conbatoit, si se hasterent mout de lui aidier et orent grant despit de ce que le conte de la Marche les ot premiers envaïz ; si li coururent sus. Iluec entrerent en champ les ii roys atout leur pooir l’un contre l’autre. Lors fu l’occision grant et la bataille aspre et dure ; si ne le porent plus li Englois endurer ne soustenir le fais de la bataille, si commencierent à fouir et à reculer. Quant le roy Henri vit sa gent fouir et apetisier, si fu trop durement corrouciez et esbahiz ; si s’en torna vers la cité de Saintes. Les François virent les Englois desrouter et fouir, si les enchaucierent mout asprement et en ocistrent en fuiant grant plenté. En cel estour furent pris xxii chevaliers et trois clers mout riches hommes et de grant renon, et si furent pris vc sergenz d’armes sanz la piétaille.

Quant le roy ot eu victoire, il fist rapeler sa gent qui trop asprement enchaçoient les Englois ; lors s’en retornerent li chevalier et li sergent par le commande-

  1. Alphonse, frère de Sanche II de Portugal, qui avait épousé Mathilde, comtesse de Boulogne.