Les Sarrazins de Damiete furent si espoentez que si comme les barons de France entendoient à euls logier, il atendirent tant qu’il fu anuitié, et puis s’en issirent de la ville celeement, et bouterent le feu dedenz. Quant la gent de France l’aperçurent, si coururent vers la cité ensemble et entrerent dedenz parmi i pont de nez que Sarrazin n’orent pas loisir de depecier, et regarderent entour la ville et aperçurent bien que Sarrazin s’en estoient fouiz ; si le firent savoir au roy et quant il le sot il fist metre sa garnison par toute la cité et fist tendre les trez et les paveillons plus près de la cité. Mout grant garnison trouverent en la ville, et si en avoient Sarrazins assez porté et le feu en avoit gasté d’autre part grant partie.
La cité estoit fort de murs, et de hautes tours avironnée, et le Nilus qui tout entour couroit, et si avoit esté enforciée puis le temps que le roy de Jherusalem l’avoit prinse. Le roy commanda que la cité fust delivré des charongnes d’ommes et de bestes et d’autres ordures. Quant la cité fu delivrée des ordures, le legat et le patriarche de Jherusalem et les evesques qui present estoient, atout le clergié, entrerent à procession en la cité, chantant la loenge de Dieu ; et le roy ala après tout nuz piez et les barons et le pueple mout
- ↑ Guillaume de Nangis, Vie de saint Louis, dans Rec. des Hist. des Gaules et de la France, t. XX, p. 372-373 ; Chronique latine, t. I, p. 203-204 ; Vincent de Beauvais, Speculum historiale, liv. XXXI, chap. xcviii. Cf. Joinville, chap. xxxv.
