mout de fere le commandement du roy : si envoia à Paris xm livres. Le roy ne volt pas qu’il demourassent en son tresor, ançois en fist feire la meison Dieu de Ponthoise, et la monteplia en rentes et en terres ; et si en fist fere le dortoir aus Freres Preecheeurs de Paris, et du remenant fist fere le moustier aus Freres Meneurs de Paris. Et li sires de Couci s’en ala outre mer, qui n’osa demourer outre le terme qui li fu mis. Grant exemple doit estre à touz ceus qui tiennent justice que si très haut homme et de si grant lignage qui n’estoit acusé que de povres genz, trouva à grant paine remede de sa vie.
Quant les barons de France entendirent le grant sens et la droite justice qui estoit el bon roy, si se douterent forment et li porterent grant honneur pour ce qu’il estoit de sainte vie. Si ne fu puis nus hons qui osast aler contre lui en son reamme ; et se aucuns estoit rebelles, tantost estoit humeliez et abatu son orgueil. En ceste maniere tint le roy son reamme en pès tout le cours de sa vie puisqu’il fu repairiez de la terre d’outre-mer.[3]Quant le roy savoit aucun haut prince qui eust aucune indignacion ou aucune malivolance contre
