rirent à granz cops estenduz sus les François, si que par force il les reculerent. Quant le roi Karle vit ce, qui estoit en la seconde eschiele et qui se devoit combatre à Mainfroi, si se feri a toute sa bataille entr’eus, mout irié en son corage. Li Alemant se tindrent mout bien et longuement quar il estoient bon chevalier et aussi comme tous armez de doubles armes, si que les espées des François ne les porent empirier ne mal metre. Quant ce virent François, si sachierent petites espées courtes et agues et estroites devant, et commencierent à crier en la langue françoise : « A estoc, à estoc dessous l’esselle », là où li Alemant estoient legierement armé. A celle criée, fu la bataille grant et mortel. Les François leur lancierent les espées agues es cors, et les Alemanz tresbuschierent aussi comme blé qui verse après la faucille ; si furent tuit mort et vaincu, et poi ou neant en eschapa qui ne feussent mort et ocis. Après ce que les Alemanz furent desconfiz, le roy et sa gent se ferirent en la seconde eschiele que Gauvain conduisoit et Jourdain. Mais quant il virent que les Alemanz furent desconfiz, es quiex il avoient toute leur esperance, si ne sorent que fere de fouir. Si tost comme François aperçurent leur mauvése contenance, si leur coururent sus hastivement, qu’il ne leur eschapassent, et se combatirent si forment à euls qu’il les desconfirent touz. En celle desconfiture furent pris le conte Gauvain, le conte Jourdain et le conte Berthelemieu[1] et pluseurs autres.
- ↑ Le comte Barthélemi fut exécuté, en même temps que les deux autres et que Conradin, le 29 octobre 1268.
