dant Henri les vit resortir, si les blasma mout et leur dist que grant honte seroit à touz jourz mès se si poi de gent les vainquoient. Lorsque il entendirent ce, il se ferirent tuit en la bataille mout fierement. François qui s’estoient i poi restraint el champ les reçurent viguereusement et recommença la bataille, si i ot grant abateiz et grant effusion de sanc, et ferirent tant François seur leur anemis qu’il tornerent en fuie. i poi les enchacierent, pour ce qu’il estoient lassez des ii batailles qu’il avoient vaincues, et leur chevaus trop travailliez pour le fais qu’il avoient soustenu si longuement. Dant Henri et sa gent fouirent par cassiaus et par villes hors chemin, en tolant et en ravissant quanqu’il pooient tolir et embler. Tant fouirent que il vindrent à Saint Benoit de Mont de Cassin et distrent à l’abbé qu’il avoient le roy Karle ocis. Mais li abbés ne vit en dant Henri fors honte et confusion ; si fist dant Henri prendre et metre en sa prison, car il amoit le roy Karle pour ce qu’il se conbatoit por l’Eglise.
Quant le roy et sa gent orent ainsi dant Henri chacié du champ, il rendirent grâces à Nostre Seigneur de la grant victoire qu’il leur avoit donnée, ne ne pristrent pas la loenge du fet à euls, ançois la donnerent à la divine puissance. Après qu’il orent rendu
- ↑ Guillaume de Nangis, Vie de saint Louis, dans Rec. des Hist. des Gaules et de la France, t. XX, p. 436-437.
