des ondes de mer. Assez tost après, la mer se commença à acoisier[1]. Lors alerent digner et cuidierent trouver yaues douces ; mès elles furent corrompues pour la tempeste, dont mout de gent et de chevaus morurent. Avec ce il estoient mout esbahi de ce que il ne venoient à port et que il ne prenoient terre vers Chastiau Castre[2] en Sardane, où il devoient tuit arriver et atendre l’un l’autre. Messire Phelippe, le premier fiuz le roy estoit en autel doute comme il estoient, si envoia une galie à son pere pour savoir la verité de la chose, car il li estoit avis que les mariniers de sa nef sigloient en doutance. Pour ceste chose furent mandez les granz mestres des nez devant le roy.
L’en demanda aus mariniers conbien il avoit jusques au port de Chastiau Castre, et conbien il estoient près de rivage. Les mariniers respondirent paroles doutables, et distrent que il cuidoient estre près de terre ; mès certainz n’en estoient pas. Lors firent aporter la mapemonde devant le roy et li moustrerent le siege du port de Chastiau Castre et combien il estoient près du rivage. Grant soupeçon et grant murmure fu esmeue contre les mariniers, car aucun disoient que l’en deust estre, du port d’Aigue Morte à Chestiau Castre
