Page:Viard - Grandes chroniques de France - Tome 7.djvu/317

La bibliothèque libre.
Le texte de cette page a été corrigé et est conforme au fac-similé.

responnoit et disoit le sien selonc son pooir. Mout se dementoit le roy qui porroit preechier la foy crestiene en Tunes et disoit que bien le porroit fere frere Andrieu de Lonc Jumel pour ce qu’il savoit partie du langage de Tunes ; car aucune foiz, avoit frere Andrieu preechié à Tunes par le commandement le roy de Tunes qui mout l’amoit.

Si comme la parole aloit defaillant au bon roy, il ne finoit d’apeler les sains à qui il avoit devocion ; si comme saint Denis en France, et disoit une oroison qui est dite à la feste saint Denis : Tribue nobis quesumus Domine prospera mundi despicere et nulla ejus adversa formidare. Et puis si disoit une autre oroison de saint Jaque l’apostre : Esto Domine, plebis tue sanctificator et custos. Quant le roy senti l’eure de la mort, il se fist couchier en i lit tout couvert de cendre et mist ses mainz sus sa poitrine et regardant vers le ciel, et rendi l’esperit à Nostre Seigneur en celle heure meismes que Nostre Sires morut en la croiz pour le salut des ames. Precieuse chose est et digne d’avoir en remembrance le trespassement de tel prince ; especialment cil du reamme de France ; quar mainte bonne coustume y establi en son temps. Il abati en sa terre le champ de bataille pour ce qu’il avenoit souvent que quant i contens estoit meuz entre i povre homme et i riche, où il couvenoit avoir gage de bataille, le riche donnoit tant que tuit li champion estoient de sa partie, et le povre ne trovoit qui li vousist aidier ; si perdoit son cors ou son heritage. Maintes autres bonnes coustumes adreça et aleva parmi son reamme, et volt et commanda que tuit marcheant forain, et qui de estranges terres vendroient, que si tost comme il auroient leur marchean-