Le texte de cette page a été corrigé et est conforme au fac-similé.
toit, et avoit esté touz jours de grant saintée et de grant purté de corps tant comme il fu en vie ; car l’en ne treuve pas que il eust oncques à faire à fame, fors à celle que il prist en mariage. Assez sont qui dient que par la mort le roy fu acomplie la prophecie Mellin qui dist : In monte ventris morietur leo pacificus. C’est à dire : Ou mont du ventre mourra le lyon paisible. Le roy Loys fu en sa vie fiers comme i lyon envers les mauvais, et paisible merveilleusement envers les bons. Ne on ne treuve mie que onques roy de France ne autres, fors cesti mourut à Montpancier. Après ce que le bon roy fust trespassé de ce siecle, si fu aporté à Saint Denis en France ; ilec fu enterré delez son pere le bon roy Phelippe.
