Bretons. Quant il furent tuit assamblé, si furent grant ost et entrerent en la terre au roy de France par force d’armes, et la commencierent à gaster et à bouter le feu es villes et es chastiaus tant que le pueple fu si espoenté qu’il s’enfouirent à garant es fortereces et aus viles deffenssables, et manderent au roy comment il leur estoit.
Li roys fu mout enflambez et eschaufez de prendre vengence de tel fait. Grant ost assambla des conmunes et des bonnes villes de son reanme, et fu son propos d’aler premierement sus le duc de Bretaigne qui estoit mestre chevetaigne de celle besongne, et chevaucha hastivement droit ou chastel de Belesme[1] que le duc avoit receu en garde de par le pere saint Looys, quant il ala sus les Aubigois ; ne rendre ne le voloit, ainz le tenoit par force. Le roy fist enclorre tout entour le chastel et mist le siege devant, n’onques ne le lessa pour l’yver. Si fu il si grant et si froit, que trop eût esté perilleus aus hommes et aus chevaus, se ne feust la royne Blanche qui estoit au siege devant le chastel qui fist crier parmi l’ost que tuit cil qui voudroient gaagnier, alassent abatre arbres noiers et ponmiers, et quanqu’il trouveroient de laigne[2], et aportassent en l’ost. Si tost comme elle l’ost conmandé, les menus vallez de l’ost alerent abatre quanque il trouverent, et envoierent à charretes et à chevaus en l’ost.
- ↑ L’expédition de Blanche de Castille et de saint Louis en Bretagne et le siège de Bellème eurent lieu en janvier 1229 (Lenain de Tillemont, Vie de saint Louis, t. I, p. 524, et Élie Berger, Histoire de Blanche de Castille, p. 124, n. 1, et 125, n. 2).
- ↑ Laigne, bûche, bois à brûler ; ms. 2813 : « bois ».
