grelle, si li embati tout outre parmi la gorge. Quant le Sarrazin se senti à mort feru, il hauça la guisarme, et feri i chevalier parmi la teste si grant cop, qu’il li embati plaine paume de denz et tresbucha le chevalier et le cheval tout en un tas par devant lui. Après ce que le Sarrazin ot fait ce cop, il chai mort entre les piez des chevaus.
En ce Sarrazin avoit le roy de Maillogres grant esperance d’avoir victoire ; si se douta, et tuit li autre Sarrazin orent grant paour. Les Arragonnois qui bien virent leur foible contenance, lor coururent sus hastivement et ferirent et chaplerent seur euls tant qu’il les menerent à desconfiture et qu’il tornerent en fuie vers Maillogres ; et les Arragonnois les enchaucierent si près, qu’il entrerent avoec euls dedenz la ville et tindrent par force d’armes les portes ouvertes tant que le roy et grant partie de sa gent furent entrez enz[1]. Si mistrent à mort touz les Sarrazins qu’il trouverent en la ville, et les fames et les enfans mistrent en chaitivoison. Li roys fist metre sa baniere haut en la plus maistre tour, pour ce que sa gent qui venoient après lui seussent certainement qu’il avoit la ville prise, et puis se reposerent, car il estoient forment travaillié de la bataille, et trouverent vins et viandes assez pour leur cors aaisier.
Quant il orent séjorné i poi de temps, il se mistrent à la voie et vindrent à une cité qui a non Vicenne[2]. Més cil de la ville qui sorent leur venue, envoierent
