d’Artois ot congié, si se mist en chemin et ala au roy d’Espaigne ; si le reçut liéement et grant feste li fist, et parlerent ensemble de moult de choses, et moult li pria le roy qu’il feist la paiz de li et du roy de France. Le conte li promist que volentiers il le feroit[1].
Si comme il estoient ensemble, vint i message qui aporta tout l’estat et tout le secré et tout le pensé au roy de France. Quant le roy ot oy les messages, si dit au conte d’Artois : « Biau cousin, je ne sui pas sanz amis à la court le roy de France, et aussi me deussiez vous valoir et aidier par raison de linage. J’ai tiex amis qui bien me scevent mander tout son convine, et qu’il veult faire et qu’il a enpensé. »
Ainsi furent ensemble ne scai quans jours le roy et le conte, et se deduirent ensemble et esbatirent tant que le conte demanda congié, et le roy li donna volentiers et le convoia et li fist honneur et courtoisie tant comme il pot. Le conte d’Artois s’en vint tout droit en Navarre et pensa moult que le roy d’Espaigne savoit bien l’estat et le secret du roy de France ; si chei en souppeçon que ce venist de Pierre de La Broce. Lors se conseilla à ses amis se c’estoit bon qu’il s’en alast en France ou il demourast. Si li fu loé que il pourroit seurement laissier la terre à garder aus chevaliers de Pierre Sanses et à monseigneur Huitace de Biau Marcheis et aler en France si li plesoit. Le conte prist les seremens des chevaliers Pierre Sanses et leur pria moult de garder la terre en tel maniere qu’il eussent
- ↑ À la suite de ces pourparlers, deux conventions furent signées à Vittoria en novembre 1276, entre Alphonse X et Robert d’Artois (Ch.-V. Langlois, Le règne de Philippe III le Hardi, p. 107-108).
