la riviere du Lis, ceulz de Gant li distrent : « Sire nous avons juré de garder les trives de nous et du roy, si que sur li ne vous suivrons nous pas. » Le conte s’en retorna corroucié, et condampna ceulz de Gant à une grant somme d’argent, laquelle il ne vouldrent paier ; pour quoy il fist garder les pas de Gant, si que nul n’i osoit entrer ne issir qu’il ne fust mors ou pris[1], et les autres se gardoient viguereusement. Le cardinal pourchaça tant que le conte et son filz vindrent parler à lui et les messages du roy[2] ; et fu ordené que li cuens vendroit à Paris à la miquaresme après et feroit hommage au roy, et seroient confermées les condicions de la pais. Mais le conte n’i vint pas, ains trouva frivoles et cavillacions[3].
Et en ce meisme an, le samedi après l’Ascension[4], trespassa très noble homme Loys conte de Evreux[5] ; et le mardi ensuivant[6], present le roy et moult d’autres barons et prelas et le cardinal Gocelin qui estoit venuz à Paris, lequel chanta la messe, qui estoit venus pour la paiz des Flamens, emprès sa femme aus Freres Preescheurs fu mis en sepulture.
- ↑ Le ms. fr. 10132, fol. 401 vo, met ici : « et ceuz qui en issoient, il les faisoit mutiler ou mettre en prison ; et d’autre part, cil de Gant molestoient et grevoient le conte et ceus qui de par lui estoient ».
- ↑ L’entrevue eut lieu à Saint-Léger de Tournai, le 22 août 1319 (Lehugeur, op. cit., p. 152).
- ↑ Frivoles et cavillations, futilités et chicanes. Latin : « excusationes frivolas ».
- ↑ 19 mai 1319.
- ↑ D’après la Chronique parisienne anonyme (Mémoires de la Soc. de l’hist. de Paris, t. XI, § 30), le comte d’Évreux mourut à Longpont et son cœur fut porté aux Cordeliers.
- ↑ 22 mai.