fu devisié que l’en feroit i chastel de fust grant et large, si qu’il peust estre dedens serjans d’armes preuz et hardiz qui bien et viguereusement lançassent et treissent et getassent sus les javeloz aus Sarrazins, si qu’il les peust despecier ou tollir la viande qui venoit de Tunes et sus le rivage de la mer. Par dehors estoient arbalestriers et autres serjans pour deffendre le chastel, et avoient galies toutes prestes pour entrer plus avant en la mer toutes foiz que mestier en seroit.
Quant il orent ainsi ordené leur besoigne, le roy Phelippe manda son charpentier qui moult bien se savoit entremetre de tel besoigne et li commanda qu’il feist i chastel hastivement. Et cil fist son commandement et apresta galies toutes armées et bien appareilliées, et fist entrer enz bons serjans et hardiz avec grant foison d’avirons, et coururent parmi la mer contre leurs anemis, et pristrent touz les vessiaux qui portoient la viande aus Sarrazins, et aucuns en tresbuchierent et plungierent en la mer. Le chastel eust esté fait et acompli en pou de temps s’il ne fussent acordez ensemble[1].
Si comme le roy de Tunes estoit en tel point, il
