nue ; si se hasta moult de savoir son repaire et où il estoit à hostel, car il estoit en grant pensée comment il le pourroit occire. La cause pourquoy, c’estoit pour ce que Symon de Monfort conte de Lincestre pere de celui Gui, fu occis en bataille par le conseil de celui Henri. Tant fu espié de jour et de nuit que Gui le trouva en l’eglise Saint-Lorent, assez près de son hostel. Si le cuida chacier hors du moustier, si ne pot pour la presse de la gent. Quant il vit qu’il ne le pourroit avoir, si le feri d’un coutel parmi le cors, et chai à terre du grand cop qu’il li donna, puis le traina hors du moustier. Henri li cria merci jointes mains pour Dieu, qu’il ne l’occeist. Et Gui li respondi : « Tu n’eus pas pitié de mon pere ne de mes freres » ; si le feri derechief du coutel qu’il tenoit iii foiz ou iiii, tant qu’il le laissa tout mort. Onques la gent Henri ne furent si osez qu’il s’osassent mouvoir, pour la mesnie Gui qui près estoit pour eulz occirre maintenant. Quant ce fu fait, Gui monta et sa compaignie qui touz estoient près de li recevoir ; si s’en ala tout droit au conte Rous[1] de Touscane, car il avoit sa fille espousée et devoit tenir toute sa terre après son decés. L’en aporta nouvelles au roy de France de la mort Henri d’Alemaigne, et comment il avoit esté occis ; si ot grant despit et desdaing de ce que Gui avoit fait si vilain fait et si vilain murtre en la presence de sa venue, et commanda que s’il venoit à sa court, qu’il fust pris et retenu. Puis souffri Gui grant penitence, quar il en fu enchartré en i fort chastel et y demora tant que l’Apostoile li fist grâce et misericorde.
- ↑ Rous, Rosso Aldobrandino. Cf. Flores historiarum, éd. Luard, t. III, p. 17.
