Item, environ la feste de monseigneur saint Jehan Baptiste, il apparut une comete, laquelle fu née ou signe des Gemmiaux, par la rayson de l’eclipse de l’an precedent qui avoit esté le iii jour de mars, par Marce et par Saturne, si comme les astronomiens disoient. Et encore disoient que pour la cause du signe ouquel elle avoit esté engendrée, et des Jumiaux, que elle signifioit habondance de sanc corrompu, dont il se devoit ensuivre maladies. Et pour la rayson de Mars qui estoit ou signe du Scorpion, il signifioit faussetez, fraudes, mençonges, larrecins, guerres. Et pour la raison de Saturne, convoitises, extorsions, rancunes, haines, machinacions, inobediences, miseres de cuer, mort, rumeurs espoentables et paour et plusseurs autres choses, tant en princes, en barons, en gens d’eglise comme en autres choses de terre ; c’est à savoir en bestes à iiii piez, en poissons, et es yaues doivent estre moult d’inconveniens.
Item, environ la feste de Touz Sains, les gens au roy d’Angleterre pristrent i chastel du roy de France que on appelle Paracol en Xanctonnois[1], et ardirent les villes qui estoient prochaines audit chastel, et si tuerent plusseurs personnes ou pays.
Item, en ce temps, l’en disoit communement que le roy d’Angleterre ne vouloit pas seulement envahir le royaume de France, mais il y vouloit entrer[2]. Si ne savoit le roy de France par quelle part il y vouloit entrer. Adonques li convint faire garder toutes les en-
