roy d’Angleterre a toute sa navie qui vient sur nous. Si vous voulez croire mon conseil, vous vous trairez en haute mer, car se vous demourez ci parmi ce qu’il ont le vent et le souleil et le flot de l’yaue davantage, il vous tendront si court que vous ne vous pourrois aidier. » Adonc respondi Nichole Beuchet que miex se saroit meller d’un compte faire que de guerroier en mer. « Honnis soit qui se partira de ci, car yci les atendrons et prendrons nostre aventure. » Tantost leur dist Barbevaire : « Seigneurs, puisque vous ne voulez croire mon conseil, je ne me veul mie perdre, je me mettrai aveques mes IIII galies hors de ce trou. » Et tantost se mist hors du hale a toutes ses galies, et virent venir la grant flote du roy d’Angleterre. Et vint une nef devant qui estoit garnie d’escuiers qui devoient estre chevaliers, et ala assambler à une nef que on appelloit la Riche de Leure ; mais les Anglois n’orent durée à celle grant nef, si furent tantost desconfiz et leur nef acravantée, et touz ceulz qui dedenz estoient mis à mort, et orent noz gens belle victoire. Mais tantost après vint le roy d’Angleterre asambler aus gens de France a toute sa navie, et commença ilec la bataille moult crueuse ; mès quant il se furent combatuz depuis prime jusques à haute nonne, si ne pot plus la navire du roy de France endurer ne porter le fès de la bataille, car il estoient si entassez l’un en l’autre qu’il ne se pooient aidier ; et si n’osoient venir vers terre pour les Flamens qui sur terre les espioient. Et aveques ce, les gens que l’en avoit mis es nefs du roy de France n’estoient pas si duiz d’armes[1] comme les Anglois estoient, qui estoient presque touz
- ↑ Si duiz d’armes, si habiles aux armes.
