ylec s’arresterent, et avoient fossés devant eulz, si que on ne pooit venir à eulz, et avoient par devant eulz mis bretesches qui avoient grans broches de fer et estoient couvertes de toile afin que on ne les peust apercevoir. Et en l’autre bataille après, qui moult estoit grant, furent ceulz du Franc. A l’autre costé sus le mont dalés, à la costiere d’Arques[1], furent arrengiez ceulz d’Ypre qui estoient grant quantité ; et entre ces II batailles estoient arrengiez ceulz de Furnes et Bergues et leurs chasteleries. Et pour garder les tentes estoient demourez ceulz de Poperingues et toute la chastellerie de Cassel et de Bailleul. Ore y avoit I fossé traversant qui s’estendoit de la bataille d’Ypre qui estoit sur le mont, jusques à la bataille monseigneur Robert d’Artoys.
Quand les chevaliers qui estoient à Saint Omer virent les Flamens rengiez au bout des forbours de la ville, si issirent hors par routes sanz conroy, et furent ja issuz touz les banerois excepté le duc de Bourgoigne et le conte d’Armignac avec toutes leurs batailles. Et la cause pourquoy le duc ne issi, si fu telle, car le roy li avoit mandé qu’il ne se combatist pas à Robert d’Artoys ne à son effort sanz lui. Quant les chevaliers furent venuz en plain pays où les Flamens estoient arrengiez, moult firent de courses sus eulz, mais onques ne les porent entamer, et durerent ces courses de midi jusques à complie ou environ. Quant le duc de
- ↑ La Chronographia, t. II, p. 130, dit : « versus montem juxta Sanctum Bertinum », et Istore et croniques de Flandres, t. I, p. 388, disent : « A l’autre lés, sur le mont dalés la maison de Saint-Bertin qui est au bout d’Arques vers Saint-Omer. »
