Bourgoigne vit que ses anemis estoient si près de lui, si appella le conte d’Armignac et ses conseilleurs et leur dist : « Seigneurs que me louez vous ? Je ne puis veoir voie que je ne soie aujourd’ui deshonnorez ou que je ne desobeisse au roy. » Adonc dist le conte d’Armignac : « Sire, à l’aide de Dieu et de voz bons amis, à la pais du roy vendroiz-vous bien. » Tantost dist le duc : « Or nous alons armer de par Dieu et de par monseigneur saint George. » Quant il fu armé, si issi de la ville, et n’avoit pas plus haut de L hommes d’armes aveques lui, et s’en ala droit à la maladerie sanz arrester ; et là trouva à l’encontre de lui la bataille messire Robert d’Artoys. Après, issi le conte d’Armignac qui avoit bien viiic hommes d’armes, desquiex il en y avoit bien iiic armez parfaitement, et celle bataille se trait vers ceulz d’Ypre qui estoient à destre. Quant les Bourgoignons virent le duc aus champs, si se trairent vers li ; mais les Artisiens et les Flamens qui de la partie au roy estoient, se tindrent touz quoiz en la champaigne où il estoient. Adonques vindrent les grans batailles de Bergues et de Furnes et du Franc à travers les champs et leur coururent sus ; et les Artisiens et les Flamens se deffendirent contre eulz. Mais quant il vindrent au fossé qui traversoit, si ne porent aler oultre ; tantost retournerent les banieres, et en retournant ot maint haut homme desconfit ; et s’enfuioient de touz costez, et laissierent leur seigneur enmi les champs es mains de leurs anemis, se la grâce de Dieu ne l’eust sauvé. Tantost que les Flamens virent les banieres retraire, si saillirent oultre le fossé a grans routes, et coururent après eulz et les cuidoient avoir desconfis. Mais quant les Artisiens les
