touz ceulz qu’il feroit d’un grant glaive qu’il tenoit, à terre il les trebuschoit et sanz remede tous mors les mettoit. Et quant les Anglois virent qu’il ne le pooient vaincre ne seurmonter, si firent voie à i archier qui traist une saiette contre lui et le feri si fort en la jointure du genoil, qu’il ne pot onques puis demener son corps ne soy mouvoir si legierement. Adonc les Anglois s’assamblerent contre lui et li firent plusseurs playes, et finablement l’occistrent. Lequel chevalier noble et vaillant aussi mort noblement et occis pour la defense du pays il ne souffist mie aux Anglois, ainçois les denz li rompirent en la bouche à cops de pierres et traistrent les iex à son escuier.
Quant monseigneur Richart Toutesham[1], capitaine de la Roche Deryan, oy sa mort, si en mena grant dueil par samblant, especiaument pour ce qu’il avoit esté si vaillant de corps et de volenté, et pour ce qu’il ne l’avoient pris vif. Celle matinée, il tuerent monseigneur Geffroi de Kerrinel[2] et plusseurs autres non mie si notables ne si puissans. Il pristrent aussi le seigneur du chastel de Quoetfreec, et monseigneur Geffroy de Quoettrevan, chevalier, et Rollant Phelippe, souverain seneschal de Bretaigne, et maistre Tybaut Meron, doctor en droit canon et en droit civil, auquel il firent porter les charges de vin à la Roche Deryan, en cotte, nuz piez, sanz chaperon et sanz braies. Il emporterent des meubles de Lannuon sanz nombre, et emmenerent touz les prisoniers qu’il porent, nobles
