Page:Viau - Œuvres complètes, Jannet, 1856, tome 1.djvu/348

Si pour me divertir amour veut que je lise,
Ce sont vers que luymesme a composé pour moy.

Dans le trouble importun des soucis de la guerre,
Chacun me voit chagrin, car il semble,à me voir,
Que je fais des projects pour conquerir la terre,
Et mes plus hauts desseins ne sont que de t’avoir.

STANCES.

J’ai trop d’honneur d’estre amoureux,
Et voy bien que les plus heureux
Ont droict de me porter envie ;
Mais, quoy que menasse le sort,
Je puis bien deffier la mort.
Puisque vous possedez ma vie.

Les plus devotieux mortels,
Rendant leur service aux autels
Qu’on dresse aux deitez supresmes,
Ne font brusler que de l’encens,
Et pour vous adorer je sens
Que je me suis bruslé moy-mesme.

Les roys ont de divers honneurs :
Leurs esclaves sont des seigneurs,
Les elemens sont leur partage,
Toute la terre est leur maison ;
Moy je n’ay rien qu’une prison,
Mais je l’estime davantage.