Orig. – Arch. de la préfecture de la Dordogne. Envoi de M. le préfet.
Messrs, J’ay sceu pour tout certain, mesmes par des catholicques, comme noz ennemis font menées et pernitieuses entreprinses contre ceulx de la Religion et catholiques associez. Aussy les fortes et estroictes gardes qu’ils font par les villes et places où ils commandent tesmoignent assés de leurs mauvaises intentions. Du moyen de quoy vous debvés prendre garde à vous de prés, et vous conduire selon leurs comportemens, de peur qu’inconvenient ne nous advienne, n’ayant voulu faillir de vous donner cest advis, pour le soing que j’ay à vostre conservation, et à la cause et party que j’ay soustenu, comme pour cest effect, quand l’occasion, la necessité le requerra, j’employeray tres-volontiers tous les moyens que j’auray et ma propre personne, avec la mesme desvotion. Sur ce, je prie Dieu m’assister en ceste saincte cooperation, et vous tenir, Messrs, en sa saincte et digne garde. De Nerac, ce[1].... jour d’apvril 1578.
HENRY.
Depuis la presente escripte j’ay este adverty des desseins que nosdicts ennemis font sur plusieurs villes et places, et jusques aux maisons des particuliers. Par quoy, prenés garde à vous de prés, pour resister à leurs executions. Et faisant ceste postille on m’a envoyé advertissement certain qu’ils veulent attaquer entre cy et mardy la porte du Pin, ce que je ne crois pas. Mais au cas qu’ils le fissent, je vous prie tenir tout le monde prest pour envoyer au secours aussi tost que je le vous manderay.
- ↑ Sur la copie envoyée de Périgueux, d’après un original, gâté par l’humidité, on a ainsi laissé la date du mois en blanc.