Imprimé. – Œuvres du seigneur de Brantome, t. XIV, contenant les lettres d’André de Bourdeille, etc. Lettre LXXII, p. 359, édition de La Haye, 1740. – Et Vie militaire et privée d’Henri IV, Paris, an XII, in-8o, p. 20.
À MON COUSIN MONSR DE BOURDEILLE.
Mon Cousin, Par la depesche que Monsieur vous fait presentement, vous cognoistrez comme nous travaillons à parachever les choses encommencées, vous ayant nommé et commis à l’execution des edicts, articles et conferences de la seneschaussée de Perigord, et avec vous le sr de Campaignac, de la part de la religion reformée, afin de proceder tous deux ensemble et d’une commune main a l’effect de ce qui a esté resolu. Et d’autant qu’estes un des plus zelez et affectionnez au bien de la dicte paix et tranquillité publique, m’asseurant que vous employerez sincerement et franchement en si bonne œuvre, je vous prie, mon Cousin, suivant l’instruction qui vous est envoyée, vous acheminer incontinent au lieu qui vous est mandé, pour avec le sr Campaignac, que vous advertiriez, proceder au faict de vostre commission et à l’establissement de ce qui sera necessaire pour le repos d’un chascun soubs l’obeyssance des edicts du Roy mon seigneur. En quoy je m’asseure que vous vous comporterez avec l’equité et droicture requises, et d’autant plus fidellement que vous sçavez et cognoissez le bien principal de la paix consister non aux edicts, mais en l’execution d’yceulx. Ce que nous attendons de vous, avec un bon et ample proces-verbal de tout ce que ferez. Et sur ce, je prieray Dieu, mon Cousin, vous avoir en sa saincte et digne garde.
De Cadillac, ce premier jour de febvrier 1581.