Recueil des lettres missives de Henri IV/1583/12 avril ― À mon cousin monsieur de Matignon

La bibliothèque libre.



1583. — 12 avril.

Orig. — B. R. Fonds Béthune, Ms. 8854, fol. 82 recto.


À MON COUSIN MONSR DE MATIGNON,

MARESCHAL DE FRANCE.

Mon Cousin, Ceulx de la religion reformée de Villeneufve d’Agenoys envoyent vers vous pour, suivant les editz de paix du Roy mon seigneur, avoir l’exercice de leur religion dans l’enceinte de la ville. C’est chose qui ne leur peut estre desniée, ayant pour loy et reigle indubitiable les mots exprés du dict edict ; à l’entretenement duquel sçachant combien vous apportez de sincere affection, je ne m’amuseray à vous y exciter par ceste mienne. Bien vous prieray-je de considerer que la chose qui plus nourrit les deffiances parmy les ungs et les aultres est d’y laisser durer les marques de l’oppression. Il n’est que bon de faire garde dans les villes, mais non d’y avoir des citadelles, lesquelles, oultre la despense, ne servent que d’accroistre l’insolence des ungs et la juste crainte des aultres. Je vous prye affectueusement, mon Cousin, pourvoyant à l’exercice des dicts de la religion reformée à Villeneufve, faire oster les dictes citadelles, leur establissant neanmoins ung ordre certain et asseuré pour leur garde et conservation. Et sur ce, je prye Dieu, mon Cousin, vous tenir en sa saincte garde. De Nerac, ce xije d’avril 1583.

Vostre bien affectionné cousin et amy,


HENRY.