Ronsard - Œuvres, Buon, 1587/La Lune eſt couſtumiere
»
A Lune eſt couſtumiere
» De naiſtre tous les mois :
» Mais quand noſtre lumiere
» Eſt eſteinte vne fois,
» Sans nos yeux reſueiller
» Faut long temps ſommeiller.
Tandis que viuons ores,
Vn baiſer donnez-moy,
Donnez-m’en milles encores,
Amour n’a point de loy :
A ſa Diuinité
Conuient l’infinité.
En vous baiſant Maiſtreſſe,
Vous m’auez entamé
La langue chantereſſe
De voſtre nom aime.
Quoy ? eſt-ce là le prix
Du trauail qu’elle a pris ?
Elle par qui vous eſtes
Déeſſe entre les Dieux,
Qui vos beautez parfaites
Celebroit iuſqu’aux Cieux,
Ne faiſant l’air ſinon
Bruire de voſtre nom ?
De voſtre belle face
Le beau logis d’Amour,
Où Venus & la Grace
Ont choiſi leur ſeiour,
Et voſtre œil qui fait
Le Soleil moins parfait :
De voſtre ſein d’yuoire
Par deux ondes ſecous
Elle chantoit la gloire,
Ne chantant rien que vous :
Maintenant en ſaignant,
De vous ſe va plaignant.
Las ! de petite choſe
Ie me plains ſans raiſon :
Non de la playe encloſe
Au cœur ſans gueriſon,
Que l’Archer ocieux
M’y tira de vos yeux.