Ronsard - Œuvres, Buon, 1587/Mignonne, allons
Œuvres de P. de Ronsard, Texte établi par Jean Galland, Claude Binet et al., Buon, , Tome 2 (p. 95-96).
ODE XVII.
Ignonne, allons voir ſi la Roſe
Qui ce matin auoit deſcloſe
Sa robe de pourpre au Soleil,
A point perdu ceſte veſprée
Les plis de ſa robe pourprée,
Et ſon teint au voſtre pareil.
Las ! voyez comme en peu d’eſpace,
Mignonne, elle a deſſus la place
Las las ſes beautez laiſſé cheoir !
O vrayment maraſtre Nature.
Puis qu’vne telle fleur ne dure
Que du matin iuſques au ſoir !
Donc, ſi vous me croyez Mignonne,
Tandis que voſtre âge fleuronne
En ſa plus verte nouueauté,
Cueillez cueillez voſtre ieuneſſe :
Comme à ceſte fleur la vieilleſſe
Fera ternir voſtre beauté.