Ronsard - Œuvres, Buon, 1587/O fontaine Bellerie
Fontaine Bellerie,
Belle fontaine cherie
De nos Nymphes, quand ton eau
Les cache au creux de ta ſource
Fuyantes le Satyreau,
Qui les pourchaſſe à la courſe
Iuſqu’au bord de ton ruiſſeau.
Tu es la Nymphe eternelle
De ma terre paternelle :
Pource en ce pré verdelet
Voy ton Poëte qui t’orne
D’vn petit chéureau de lait,
A qui l’vne & l’autre corne
Sortent du front nouuelet.
L’Eſté ie dors ou repoſe
Sus ton herbe, ou ie compoſe
Caché ſous tes ſaules vers,
Ie ne ſçay quoy qui ta gloire
Enuoira par l’Vniuers,
Commandant à la Memoire
Que tu viues par mes vers.
L’ardeur de la Canicule
Ton verd riuage ne brule,
Tellement qu’en toutes pars
Ton ombre eſt eſpaiſſe & druë
Aux paſteurs venans des parcs,
Aux bœufs las de la charruë,
Et au beſtial eſpars.
Iô, tu ſeras ſans ceſſe
Des fontaines la princeſſe,
Moy celebrant le conduit
Du rocher percé qui darde
Auec vn enroué bruit
L’eau de ta ſource iazarde
Qui trepillante ſe ſuit.