Page:Rabelais marty-laveaux 02.djvu/120

Panurge faict discours pour retourner à Raminagrobis.

Chapitre XXIII.

Retournons (dist Panurge continuant) l’admonester de son salut. Allons on nom, allons en la vertus de Dieu. Ce sera œuvre charitable à nous faire : au moins s’il perd le corps & la vie, qu’il ne damne son ame. Nous le induirons à contrition de son peché : à requerir pardon es dictz tant beatz pères : absens comme praesens. Et en prendrons acte, affin qu’après son trespas ilz ne le declairent hereticque & damné : comme les Farfadetz feirent de la praevosté d’Orleans : & leurs satisfaire de l’oultrage, ordonnant par tous les convens de ceste province aux bons pères religieux force bribes, force messes, force obitz & anniversaires. Et que au iour de son trespas sempiternellement, ilz ayent tous quintuple pitance : & que le grand bourrabaquin plein du meilleur trote de ranco par leurs tables, tant des Burgotz, Layz, & Brissaulx, que des prebstres & des clercs : tant des Novices, que des Profès. Ainsi pourra il de Dieu, pardon avoir.

Ho, ho, ie me abuse, & me esguare en mes discours.