Thresor de la langue françoise/Introduire

La bibliothèque libre.
Intruz  ►

Introduire, act. penac. Est composé de Intrò diction Latine entiere, & duire Françoise aussi entiere, mais inusitée en ce sens, horsmis en composition, & signifie mener au dedans de quelque lieu, Introducere, comme, Ie l'ay introduit à l'bostel, Introduxi in domum, Cic. Tuscul. 5. Il a introduit la garnison en la ville, Præsidium in oppidum introduxit, Cæsar. li. 1. Bell. ciuil. Mais le François en vse plus communément par translation, pour dire, mettre aucun en auant & credit, en la cognoissance, grace, amitié & faueur d'vn autre. Car comme celuy qui mene au dedans de quelque lieu celuy qui estoit dehors, le met en l'interieur d'iceluy : ainsi qui met l'incognu ou non familier en la cognoissance, priuauté & amitié d'aucun, semble le mettre en l'interieur du cœur d'iceluy, par laquelle mesme raison les anciens disoyent Introduire vn ieune damoiseau aux armes & en la cheuallerie, & lon dit à toute heure Introduire aucun aux lettres & bonnes mœurs, c. luy monstrer & enseigner l'art des armes & de cheuallerie, les lettres, sciences & bonnes mœurs, par ce que celuy qui instruit aucun esdites choses, il le mene comme par la main en l'interieure cognoissance d'icelles. Dont les opuscules qui contiennent les premiers enseignemens & entrées de quelque sçauoir, sont appelez Introductions, comme, Introduction en l'art de musique, de geometrie, & semblables. Introduire aussi est mettre en auant & semer vne nouuelle & inusitée opinion, ou preposition, Ce que Ciceron dit Introducere, Et au 1. De nat. deor. Et au 4. des Academiq. & de finibus, & au 3. de offic. On dit aussi Introduire, vn personnage parlant en vne farce, moralité, ou dialogue, pour le faire l'vn des Interloquuteurs en iceluy, Interloquutorem inducere, Ce qui sembleroit estre dit contrariamment à l'energie de ladite composition, par ce que les farces, moralitez & dialogues se iouënt sur eschaffauts & à la veuë de tous, mais qui est introduit parleur en tels actes, il est fait du corps & compagnie des iouëurs, qui est le seul respect pourquoy on le dit estre introduit, voyez Introduction.