Thresor de la langue françoise/Tresbucher
Tresbucher, acut. Verbe neutre, & semble estre de la forme de Trespasser, qui prend son energie de ceste particule Latine Trans : Quoy que s'en soit, Il se prend ores pour broncher, Cespitare, offendere, Qui est en chemināt par faute de leuer le pied ou inaduertament chopper contre vne pierre, busche, bosseure du chemin ou autre chose estant en iceluy, Si qu'ō donne presque du nez à terre. Selon laquelle signification on dit par translation, tresbucher en peché, In peccatu incidere, Et ores pour surpoiser, selon laquelle signification on dit és monnoyes d'or & d'argent, quelles tresbuchent, ou sont tresbuchans, quand elles surpoisent & enleuent le poids auquel elles sont poisées & iustifiées, qui est quand la ballance en laquelle telle desdites especes est emporté, l'autre où le pois iustificatif est mis.