« L’âpre fureur de mon mal véhément »
« L’âpre fureur de mon mal véhément »
Diane. Premières Amours dans Desportes - Premières œuvres (éd. 1600), Paris: Mamert Patisson, (p. 6a).
XX.
L’aſpre fureur de mon mal vehement
Si hors de moy m’etrange & me retire,
Que ie ne ſçay ſi c’eſt moy qui ſoupire,
Ny ſous quel ciel m’a ietté mon tourment.
Suis ie mort ? Non, i’ay trop de ſentiment,
Ie ſuis trop vif & paſſible au martyre.
Suis ie viuant ? Las ie ne le puis dire
Loin de vos yeux par qui i’ay mouuement !
Seroit ce vn feu qui me brûle ainſi l’ame ?
Ce n’eſt point feu : i’euſſe eſteint toute flame
Par le torrent que mon dueil rend ſi fort.
Comment, Belleau, faut-il que ie l’appelle ?
Ce n’eſt point feu que ma peine cruelle,
Ce n’eſt point vie, & ſi ce n’eſt point mort.